ԱԺ մշտական հանձնաժողովը մերժել է ԵԱՏՄ-ից Հայաստանի դուրս գալու մասին «Ելք» խմբակցության որոշման նախագիծը
Արմինֆո. ԱԺ արտաքին հարաբերությունների մշտական հանձնաժողովում նոյեմբերի 29-ին քննարկվել է «Ելք» խմբակցության հեղինակած «Հայաստանի Հանրապետության մասով Եվրասիական տնտեսական միության (ԵԱՏՄ) պայմանագրի գործողությունը դադարեցնելու գործընթաց սկսելու վերաբերյալ» ԱԺ հայտարարության նախագիծը: Քվեարկությունից հետո նախագիծը մերժվել է:
«Ելք» դաշինքից պատգամավոր Էդմոն Մարուքյանը փորձել է «կողմ» քվեարկել, սակայն Արմեն Աշոտյանը հայտարարել է, որ Մարուքյանը հանձնաժողովի անդամ չէ, և քվեարկելու իրավունք չունի: Միակ պատգամավորը, ով սկզբում ձեռնպահ է մնացել, իսկ հետո «կողմ» է քվեարկել, «Ծառուկյան» դաշինքի ներկայացուցիչ Արարատ Զուրաբյանն էր, «կողմ» է քվեարկել նաև «Ելք» խմբակցության ներկայացուցիչ Արտակ Զեյնալյանը: Հանձնաժողովի մնացած բոլոր անդամները նախագծին «դեմ» են քվեարկել:
Նշենք, որ «Ելք» խմբակցության ներկայացրած օրինագծում, մասնավորապես ասվում էր, որ Հայաստանը պետք է սկսի ԵԱՏՄ-ից դուրս գալու գործընթաց, քանի որ կառույցին անդամակցության ընթացքում ոչ մի բնագավառում առաջընթաց չի գրանցվել՝ թե տնտեսության զարգացմանը, թե Արցախի հիմնահարցի խաղաղ լուծմանն առնչվող: