Новости за 03.10.2019

Юпа уйăхĕн 10-мĕшĕнче Чăваш Ен кадет корпусĕнче Атăл тăрăхĕнчи кадетсен тăваттăмĕш спартакиади пуçланать. Ăмăртăвăн тĕп тĕллевĕсенчен пĕри — кадетсен çар пĕлĕвне анлăлатасси, вĕсем çар хĕсметне хатĕррине тĕрĕслесси.

11 çулти Шупашкар хěрě Александра Николаева сěрме купǎс калас ǎсталǎхпа тěнче шайěнче палǎрнǎ. Вǎл Сочи хулинче иртнě ачасемпе çамрǎксен «Çěнě çырансем» пултарулǎх конкурсěнче гран-при çěнсе илнě

Кĕркунне тунсăха путмалли тапхăр мар. Çанталăк улшăннă май чунпа канса кăмăла çĕклемелли вăхăт пуçланать çеç. Симфони, опера, капелла шăпах та лăпланма та, тавра-курăма аталантарма та май параççĕ. Чăваш патшалăх академи симфони капелли çĕнĕ сезона йыхравлать.

Çанталăк сивĕтнĕ май шăнса чирлекенсен йышĕ ӳсет. Грипп тапхăрĕнче вара шкулсемпе ача сачĕсене карантина хупни те пулкалать. Халех сыхланма пуçласан чиртен пăрăнма тата ăна çăмăлтарах иртттерме пултарать, теççĕ тухтăрсем.

Чăваш Енре хĕç-пăшалпа саккуна пăсса усă курнă тĕслĕх тупса палăртнă. Федерацин хăрушсăрлăх службин следстви уйрăмĕ 2 арçынна айăпланине пĕлтерет.

Çын кĕлетки 60-70 процент таран шывран тăрать. Çавăнпа мĕн ĕçни çав тери пĕлтерĕшлĕ. Паян республикăра хуçалăхра усă курмалли е ĕçмелли 1400 ытла шыв уçламалли пусă, унсăр пуçне 1397 шыв пашни шутланать. Вĕсенчен нумайăшне юсама вăхăт çитнĕ. Чăваш Республикин Пуçлăхĕн Хушăвĕпе çитес çул шыв уçламалли пусăсемпе пашнесене çĕнетме пуçлĕç. Çакна валли 200 миллион тенкĕ уйăрнă

Республикăра нумай ача-пăчаллă çемьесене пулăшма çулсеренех хыснаран 100 миллион тенке яхăн укçа уйăраççĕ. Кǎçал 641 нумай ачаллǎ çемье çěр лаптǎкне тивěçнě. Унсăр пуçне черетре тăракансене хваттер е çурт параççĕ. Пăрачкав районĕнчи 7 ачаллă Ивановсен çемйи те малашне çута та хăтлă çуртра пурăнĕ.

Республикăн пуянлăхĕ — унăн ĕçчен те маттур, пултаруллă та хастар çыннисем. Чăваш Ен аталанăвне витĕм кÿнĕ, тĕрлĕ тытăмра вай хуракан хастарсене паян Правительство çуртĕнче патшалăх наградисемпе чысларĕç.

Республикăри вĕрентекенсен пысăк пайĕ Чăваш патшалăх педагогика университетне пĕтернĕ. Халĕ унта шкулти кашни предмет вĕрентӳçисене хатĕрлеççĕ. Паянхи кун университетра 5000 студент ăс пухать. Аслă шкулăн ĕç-хĕлне Михаил Игнатьев университет ректорĕпе Владимир Ивановпа сӳтсе яврĕ.

Вĕрентекен ĕçĕ яланах чыслă та сумлă пулнă. Вĕсем пирĕн малашлăха палăртакансем тата хатĕрлекенсем. Пĕтĕм тĕнчери учительсен кунĕ çывхарса килнĕ май Чăваш Ен Пуçлăхĕ Михаил Игнатьев вĕрентекенсене професси уявĕпе саламларĕ.