Новости за 31.03.2024

Су асты көймәсендә хезмәт итүчеләр көне уңаеннан 2008 елгы һәм алардан яшьрәк балалар һәм үсмерләр арасында Сабада көрәш ярышлары үткәрелде.Бу хакта https://saby-rt.ru/ сайтында Фәнил Мәүлетов хәбәр итә.

Кукмара районы башлыгы Сергей Димитриев ифтарда катнашты. Ул Киез итек-киез комбинатының кафесында булды. Бу хакта «Хезмәт даны» хәбәр итә.

Татарстанның Балтач, Арча, Яшел Үзән һәм Теләче муниципаль районнарында умартачылык мәсьәләләренә багышланган киңәшмәләр узды. Бу хакта Татарстан Авыл хуҗалыгы һәм азык-төлек министрлыгы матбугат хезмәте хәбәр итә.

Аксубай районы балыкчылары Киса буасында боз астыннан балык тоту буенча көч сынашты. Ярышларны оештыручы – аучылар һәм балыкчылар җәмгыяте рәисе Михаил Сулейманкин балыкчыларга уңышлар теләде. Бу хакта «Аксубай» сайтында хәбәр ителә.

«Казан Экспо» халыкара күргәзмә үзәгендә сигезенче тапкыр Fashion Iftar башланып китте.

Татарстан мөфтиятенең Рамазан ае уңаеннан җәмәгать урыннары арасында иң матур бизәлештә ярышу буенча «Нурлы Рамазан» бәйгесендә җиңүчене һәм финалга чыгучыларны бүләкләү тантанасы узды. Бәйге шартлары буенча абсолют җиңүче булып Кукмара районының Туембаш авылыннан Мөэминә Хәбибуллина йорты танылды. Мөэминә Хәбибуллинага бәйгенең төп бүләге – «ДУМ РТ Хаҗ» рәсми операторыннан хаҗга юллама тапшырылды. Финалга чыгучыларга мактау кәгазьләре тапшырылды. Бу хакта ТР Диния нәзарәте хәбәр итә.

Чистайда полиция хезмәткәрләре яшүсмернең социаль челтәрләрдә янаулар алуын тикшерә. Бу хакта «Татар-информ»га ТР буенча Эчке эшләр министрлыгының матбугат хезмәтендә хәбәр иттеләр.

1 сентябрьдән Казан мәктәпләрендә «Хезмәт», «Куркынычсызлык һәм Ватанны саклау нигезләре» дигән яңа предметлар укытыла башлый. Шулай ук математика буенча курска яңа тема кертеләчәк, дип хәбәр итә ТР Мәгариф һәм фән министрлыгы матбугат хезмәте.

Язучылар берлегенең Тукай клубында юмор кичәсе узачак, дип хәбәр итә ТР Язучылар берлеге матбугат хезмәте.

«Татар-информ»га билгеле булганча, Казанның Совет районы фитнес-клубларының берсендә бала батып үлгән. Агентлык мәгълүматлары буенча, аңа 7 яшь булган.

Рәшит Ваһапов исемендәге Халыкара татар җыры фестивале быел үзенең 20 еллык юбилеен билгеләп үтә. Бу хакта Бөтендөнья татар конгрессы сайтында хәбәр итәләр.

31 март якшәмбе кичендә, 1 апрель төнендә һәм көндез Татарстанда һава торышы шартларының шактый бозылуы фаразлана. Бу хакта ТР Гидрометеорология үзәге хәбәр итә.

Төркиянең Анталия шәһәрендә 4,2 магнитудалы җир тетрәү булган.

28 мартта Ак Күл авылының «Җомга» Җәмигъ мәчетендә традицион азан башкаручылар конкурсы узган. Бу хакта Татарстан Республикасы мөселманнары Диния нәзарәте үзәкләштерелгән дини оешмасы матбугат хезмәтенә сылтама белән Россия Мөфтиләр шурасы сайтында хәбәр итәләр.

Чираттагы, 20 гуманитар конвой махсус хәрби операция зонасына Әлмәттән килгән. Тапшырылган ярдәмнең гомуми авырлыгы 5 тонна тәшкил итә. Бу хакта «Татар-информ»га Әлмәт районы матбугат хезмәтендә хәбәр иттеләр.

Лаеш районының «Үзебезнекеләргә ярдәм» («Помощь СВОим») хәйрия фонды махсус операция солдатларына чираттагы шефлык ярдәме партиясен тапшырды.

Пенсиядәге көч ведомстволары вәкилләре һәм эшләүче пенсионерларга 1 апрельдән пенсия артмаячак, дип сөйләгән «РИА Новости»га Россия халык хуҗалыгы һәм дәүләт хезмәте академиясенең Социаль анализ һәм фаразлау институты өлкән фәнни хезмәткәре Виктор Ляшок. Бу хакта «РИА Новости» хәбәр итә.

Казанда 2024 елгы Россия венчур форумын әзерләү һәм үткәрү буенча республика оештыру комитеты составына берничә үзгәреш кертелде. Боерыкны Татарстан Премьер-министры Алексей Песошин имзалады.

Әлмәт шәһәр паркында Мәңгелек ут янында «Крокус Сити Холл»га террорчылар һөҗүме вакытында һәлак булучылар истәлегенә акция узды.

Иванова-Швец: кече шәһәр һәм авыллардан килгән медицина хезмәткәрләренә апрель аенда хезмәт хакларын күтәрәчәкләр.

Россия мөселманнарының рухи лидеры мөфти шәех Равил Гайнетдин Россиянең күренекле мөселман спортчыларын бүләкләде. Бу хакта Россия Мөфтиләр шурасы сайтында хәбәр итәләр.

Казахстанда 10 меңнән артык кеше су басу сәбәпле эвакуацияләнгән. Шуларның яртысы диярлек – балалар. Чаралар җиде өлкәдә күрелде, дип хәбәр итә ТАСС республиканың Гадәттән тыш хәлләр министрлыгына сылтама белән.

РФ Президенты Владимир Путин хәрби хезмәткә Россия гражданнарын язгы чакыру турында Указ имзалады. Документ хокукый актларны рәсми чыгару порталында урнаштырылган.

Якшәмбе, 31 мартта, Татарстанда аязучан болытлы һава торышы көтелә. Яңгырлар, урыны белән төнлә һәм иртән юеш кар булыр дип фаразлана. Бу хакта республиканың Гидрометеорология үзәге хәбәр итә.

«Казан — Хезмәт батырлыгы шәһәре» стеласының берничә яктырткычы эшләми башлаган. Аларны 1 майга кадәр төзәтергә планлаштыралар, дип белдерделәр шәһәрнең Тышкы төзекләндерү комитетында.