Новости за 01.04.2024

Бүгеннән Кукмара районы прокуратурасын юстициянең өлкән киңәшчесе Рөстәм Мәхмүтов җитәкли. Бу хакта «Хезмәт даны» сайтында Эльвира Иванова хәбәр ителә.

29-31 мартта Казанда ТР Дәүләт җыр һәм бию ансамбле «Халкыбыз мирасы» программасы премьерасы узды. Барлык концертлар да аншлаг белән үтте, дип хәбәр итә коллективның матбугат хезмәте.

Үзбәкстанда 31 мартта Бохара өлкәсе Татар-Башкорт милли-мәдәни үзәге көлке көненә багышланган концерт оештырган. Кичә 5 номерлы урта музыка һәм сәнгать мәктәбендә булган. Бу хакта Бөтендөнья татар конгрессы сайтында хәбәр ителә.

30-31 мартта Екатеринбургта XVII «Урал сандугачы» татар җыры һәм инструменталь музыка башкаручыларның төбәкара конкурсы узган. Бу хакта Татарстан Республикасының Свердловск өлкәсендәге Даими вәкиллеге сайтында хәбәр итәләр.

РФ Хөкүмәте «Газпром» һәм Россия төбәк хакимиятләре белән берлектә коммерцияле булмаган бакчачылык ширкәтләренә газ тоташтырып бетерүне тәэмин итәргә һәм бу хакта 15 июльгә кадәр хисап тәкъдим итәргә тиеш. Бу хакта РФ Президентының Федераль Җыенга мөрәҗәгатен гамәлгә ашыру буенча йөкләмәләр исемлегендә әйтелә. Документ Кремль сайтында чыкты.

13 апрельдә Мәскәүдә Россия Федерациясе Хөкүмәте каршындагы Финанс университетында 14:30 сәгатьтә «Мәскәү–Татарстан күпере» IX Мәскәү яшьләр форумы узачак.

Россия Президенты Владимир Путин бүләкләү турында боерык имзалады. Билгеләп үтелгәннәр арасында татарстанлылар да бар. Документ хокукый мәгълүмат порталында чыкты.

2024 ел 2023 елдан эссерәк булырга мөмкин. Узган ел температура буенча рекордлы ел булган иде. Әмма термометрда югары «+» күрсәткечләре мәңгелек туңлык деградациясенә китерергә мөмкин. Бу Россия өчен инфраструктура кыенлыклары китереп чыгару ихтималы белән куркыныч, дип яза РБК.

Занзибар президенты Хөсәен Али Мвиньи Россия мөселманнары рухи лидеры мөфти шәех Равил Гайнетдингә Коръәнгә хезмәт итүе өчен «Ел кешесе» премиясен тапшырган. Бу хакта РФ мөселманнары Диния нәзарәте сайтында хәбәр итәләр.

РФ Президенты Владимир Путин Хөкүмәткә хезмәт өчен түләүнең минималь күләмен (МРОТ) югары темпта арттыруны тәэмин итәргә кушты – 2030 елга ул 35 мең сумга җитәргә тиеш. Федераль Җыенга юлламаны гамәлгә ашыру буенча йөкләмәләр исемлеге Кремль сайтында чыкты.

27 апрельдә Тубыл шәһәре Себер-татар мәдәнияте үзәгендә «Себер сандугачы» X өлкә ачык вокал бәйгесе узачак. Бу хакта Себер-татар мәдәнияте үзәгенең «ВКонтакте» социаль челтәрендәге төркемендә хәбәр итәләр.

Казанның Мәрҗани мәчетендә өйлә намазыннан соң шагыйрь, Габдулла Тукай исемендәге дәүләт премиясе лауреаты Шәүкәт Гаделшаны соңгы юлга озатканнар.

Филология фәннәре кандидаты Айгөл Ганиева Татарстанның халык язучысы, Габдулла Тукай исемендәге дәүләт премиясе лауреаты Әмирхан Еникинең 115 еллыгына багышланган «Әмирхан Еники һәм татар әдәбияты яңарышы» дип аталган түгәрәк өстәл утырышында катнашты. Ул Әмирхан Еники иҗатында әхлакый-фәлсәфи проблемалар турында сөйләде.

Бүген Казанның Совет районы судында «Азатлык радиосы»* татар-башкорт хезмәте мөхәррире Алсу Кормашеваның тоткарлану срогын 2 айга озайттылар. Ул тикшерү изоляторында (СИЗО) 5 июньгә кадәр булачак. Бу турыда «Татар-информ» хәбәрчесе Дмитрий Шатров яза.

Филология фәннәре кандидаты, «Татар дөньясы» газетасы баш мөхәррире Ринат Мөхәммәдиев Татарстанның халык язучысы, Габдулла Тукай исемендәге дәүләт премиясе лауреаты Әмирхан Еникинең 115 еллыгына багышланган «Әмирхан Еники һәм татар әдәбияты яңарышы» дип аталган түгәрәк өстәл утырышында катнашты. Галим язучы турында хатирәләре белән уртаклашты.

Шушы көннәрдә махсус хәрби операция зонасына чираттагы гуманитар ярдәм Нурлаттан җибәрелде. Бу юлы ул ризыктан башлап техникага кадәр иң кирәкле әйберләрне үз эченә алды: солдатларга ике «УАЗ» машинасы тапшырдылар.

Кабан күле буена Камал театрының яңа бинасын салуны 2024 ел азагына кадәр тәмамларга планлаштыралар. Бу хакта бүген шәһәр мэриясендә эшлекле дүшәмбедә билгеле булды.

Татарстан Республикасы Дәүләт Киңәшчесе Минтимер Шәймиев ТР Фәннәр академиясе Археология институты өлкән фәнни хезмәткәре Евгений Казаков һәм Россия Фәннәр академиясе Археология институты директоры Николай Макаровка «Татарстан Республикасы алдындагы казанышлары» өчен һәм «ТАССР оешуның 100 еллыгы» медальләре белән бүләкләде. ТР Фәннәр академиясе Археология институты хезмәткәрләренә рәхмәт хатлары тапшырылды. Шәймиев үзе «Россия Фәннәр академиясенең 300 еллыгы» медален алды.

Татарстан Рәисе администрациясендә яңа бүлекчә барлыкка килде. Бу хакта Указны республика җитәкчесе Рөстәм Миңнеханов имзалады – документ хокукый мәгълүмат порталында бастырылган.

Россиядә балалы гаиләләр өчен ташламалы ипотека срогы 2030 елга кадәр озайтылачак. Россия Президенты Владимир Путин Хөкүмәткә тиешле йөкләмә белән чыгыш ясады.

31 мартта Ульяновск өлкәсе Чынлы районы Олы Нагаткин авылының «Рамазан» мечетендә Коръәнне өйрәнү дәресләренә нәтиҗә ясалды. Бу хакта Россия мөселманнары Диния нәзарәте матбугат хезмәте хәбәр итә.

Махсус операциядә катнашучыларга һәм аларның гаиләләренә ярдәм итүче волонтерларны махсус күкрәк билгесе белән бүләкләячәкләр. Россия Президенты Владимир Путин бу темага йөкләмә бирде. «Российская газета» шул хакта яза.

Бүген Татарстан Рәисе Рөстәм Миңнеханов Казанда БРИКС илләре Уеннарына әзерлек һәм аны уздыру буенча республика оештыру комитеты утырышын уздырды. Татарстан башкаласы аларны 10-26 июньдә кабул итәчәк. Бу хакта республика җитәкчесенең матбугат хезмәте хәбәр итә.

23 май көнне Россия ислам институтында «Хәзерге Россия мөселман яшьләренең бердәмлекне саклауда һәм патриотизмны ныгытуда роле» дип исемләнгән II Республикакүләм студентлар фәнни-гамәли конференциясе узачак. Бу хакта ТР Диния нәзарәте матбугат хезмәте хәбәр итә.

Ашыгыч ярдәм машиналары йөртүчеләре махсус хәрби операция барышында яраланган очракта социаль түләүләр алачак. Россия Президенты Владимир Путин законга тиешле үзгәрешләр кертергә йөкләде. Мәгълүмат Кремль сайтында чыкты.