Мөхәммәтшин: Татарстан - «Бердәм Россия» праймеризында катнашучылар саны буенча лидер
Татарстанның барлык тармакларының һәм хакимиятләренең уңышлы эшләве сайлауларда депутатларның кайсы корпусы хуплануына бәйле. Бу хакта ТР Дәүләт Советы Рәисе, «Бердәм Россия» партиясенең Татарстан төбәк бүлеге секретаре Фәрит Мөхәммәтшин белдерде.
Татарстан Дәүләт Советы матбугат хезмәте хәбәр иткәнчә, кичә кичке сәгать 8дә «Бердәм Россия» партиясенең алдан тавыш бирү процедурасы тәмамланды, аның кысаларында VII чакырылыш Дәүләт Советы депутатына кандидатлар билгеләнә.
Партиянең Генераль советы секретаре Андрей Турчак билгеләп үткәнчә, «Бердәм Россия» - сайлауларга кандидатларны ачык ысул белән сайлап алучы бердәнбер сәяси көч. Алдан тавыш бирүдә 22дән артык кандидат теркәлде, праймериз 20-26 майда электрон форматта узды.
«Татарстан - алдан тавыш бирүдә катнашучылар саны буенча лидер, 171 меңнән артык кеше кандидатлар өчен тавыш бирде һәм үз фикерен белдерде. Без баштан ук сайлаучыларга мөрәҗәгать иттек һәм аларның фикеренә таяначагыбызны әйттек. Кандидатларны сайлап алуның бу ысулы иң демократик процедура булып тора. Һәм сайлаучылар битараф калмады», - диде Фәрит Мөхәммәтшин журналистлар белән әңгәмәдә.
Ул шулай ук татарстанлыларга активлык һәм узган кампаниянең җаваплылыгын аңлаулары өчен рәхмәт белдерде.
«Алда зур эш тора: сентябрьдә VII чакырылыш Дәүләт Советы депутатларын сайлаулар узачак, аннары Татарстан Республикасы Рәисе, муниципаль депутатлар, Дәүләт Думасы депутатлары сайланачак, һәм мин барлык татарстанлыларга шундый ук актив булыгыз, дип мөрәҗәгать итәм. Татарстанның барлык тармакларының һәм хакимиятләренең уңышлы эшләве сайлауларда сезнең нинди депутат корпусын хуплавыгызга бәйле», - дип белдерде Мөхәммәтшин.
Праймеризның ахыргы нәтиҗәләре «Бердәм Россия» Генераль советы Президиумында ясалачак.