Социаль фонд Татарстанда эшләүче пенсионерлар санын атады
Ел башыннан Татарстанда яшәүче 2,3 меңнән артык кеше автомат режимда картлык буенча пенсия рәсмиләштергән. Республикада барлыгы 1 миллионнан артык кеше пенсия ала. Бу хакта «Татар-информ»га бүген Социаль фондның Татарстан буенча матбугат хезмәтендә хәбәр иттеләр.
«Хәзерге вакытта Татарстанда Социаль фонд линиясе буенча төрле пенсияләрне 1 миллионнан артык кеше ала, бу якынча узган ел дәрәҗәсендә. Шул исәптән эшкә яраклы яшьтән өлкәнрәк 859 мең кеше иминият пенсияләрен рәсмиләштергән, шуларның 126 меңе эшләвен дәвам итә», - дип хәбәр иттеләр Социаль фондта.
Шул ук вакытта республикада бер ел эчендә эшләүче пенсионерлар саны үзгәрмәде диярлек, аларның саны пенсия алучыларның гомуми санының якынча 14 процентын тәшкил итә.
Төбәктә яшәүчеләр дәүләт хезмәтләре порталында картлык буенча пенсияне рәсмиләштерә, моның өчен инстанцияләргә йөрергә һәм раслаучы документлар тапшырырга кирәкми. Бу Социаль фондның мәгълүмат системасы ярдәмендә мөмкин булды, анда барлык кирәкле мәгълүматлар исәпкә алына.
Шул ук вакытта шәхси хисапка хезмәт эшчәнлегенең барлык чорлары, эш бирүче түләгән иминият кертемнәре, стаж һәм индивидуаль пенсия коэффициентлары турында тулы мәгълүмат кертелүе мөһим, чөнки пенсия күләме шуңа бәйле.
Быел 58 яшькә җиткән хатын-кызлар һәм 63 яшь тулган ир-атлар картлык буенча иминият пенсиясенә чыга ала. 15 ел иминият стажы һәм 28,2 пенсия коэффициенты булу мәҗбүри шарт булып тора.