Төнге кан коеш: авыл кешесе үги улын һәм ике күршесен атып үтергән
Ленинград өлкәсенең Тихвин районында яшәүче авыл кешесе коточкыч кан коеш оештырган. 57 яшьлек ир-ат 3 кешене атып үтергән һәм чак кына дүртенчесен үтерми калган. Бу хакта Россия Тикшерү комитетының Ленинград өлкәсе буенча Тикшерү идарәсендә хәбәр итәләр, дип яза «КП-Петербург».
Барысы да 5 апрельдән 6сына каршы төндә була. Массакүләм үтерүдә шикләнелүче башта үги улы белән талашкан. Ясалма ау мылтыгын алып аңа аткан, 32 яшьлек ир-ат җәрәхәтләрдән урында ук һәлак булган.
Ир-атның чираттагы корбаны 70 яшьлек күршесе була, ул аның өенә кереп аягына ата, ир-ат үлә. Аннары ул башка, күптән конфликтта булган 74 яшьлек күршесе йортына килә. Ул аңа да ут ача. Пенсионер җәрәхәт алу белән котыла, ә менә алар арасына очраклы рәвештә килеп эләккән 48 яшьлек кияве урында ук үлә.
«Әлеге хәлләрдән соң җинаятьче үз йортына качкан, анда аны Росгвардия хезмәткәрләре тоткарлады. Ир-атка карата «Үтерүгә омтылу» һәм «Ике һәм аннан да күбрәк кешене үтерү» буенча җинаять эшләре кузгатылды», – дип ачыклык кертәләр өлкә Тикшерү идарәсе матбугат хезмәтендә.
Шикләнелүчене тоткарлыйлар. Тиздән аңа гаепләү белдереләчәк, аны сак астына алу мәсьәләсе дә хәл ителә. Ә тикшерү ир-атның 3 кешене үтерү сәбәпләрен ачыклауны дәвам итә.