«Чкаловский»да хезмәт итүче Татарстан егетләре видео аша әти-әниләре белән аралашкан
(Казан, 13 февраль, «Татар-информ»). Татарстан Республикасының Россия Федерациясендәге Тулы вәкаләтле вәкиллегенә «Чкаловский» авиабазасында һава космик көчләре гаскәрләрендә хезмәт итүче Татарстан хәрби хезмәткәрләре килде. Вәкиллектә оештырылган видеоэлемтә аша егетләр әти-әниләре белән аралашкан.
Вәкиллек матбугат хезмәте хәбәр иткәнчә, алар Татарстан Республикасы Премьер-министры урынбасары — Татарстан Республикасының Россия Федерациясендәге Тулы вәкаләтле вәкиле Равил Әхмәтшин белән очрашкан.
«Мәскәү төбәгендә татарстанлылар күп — алар Президент полкында, Мәскәү өлкәсенең хәрби-диңгез флоты частьләрендә хезмәт итә. Барысы белән дә аралашып торабыз, бездә уза торган чараларга чакырабыз. Алар лаеклы хезмәт итә, командованиедән уңай фикерләр генә ишетәбез. Әмма мондый очрашу бездә беренче тапкыр уза. Бүген ата-аналарын күрү мөмкинлеге булган балалар өчен бик шатбыз», — диде Равил Әхмәтшин.
Хәрбиләрне шулай ук Арча муниципаль районы башлыгы Илшат Нуриев, Татарстан Республикасының Арча һәм Әтнә районнары хәрби комиссары Алмаз Борһанов, РФ Дәүләт Думасы депутаты Илдар Гыйльметдинов, хәрби хезмәт ветераннары, Арча районы имам-мөхтәсибе Әмир хәзрәт Миңнемуллин, чиркәү әһеле Лин атакай сәламләде.
Часть командиры урынбасары Андрей Гордеев район хәрби комиссарына егетләргә башлангыч әзерлек уздырганнары өчен рәхмәт белдерде, хәрбиләрнең хезмәткә әзер диярлек килүләрен искәртте. Бер елдан азрак хезмәт итүләренә карамастан, махсус автомобиль техникасында эшлиләр, очышларны тәэмин итүдә катнашалар, частьнең барлык бүлекчәләрендә диярлек хезмәт итәләр.
Татар мили ризыклары белән чәй эчкәннән соң, хәрби хезмәткәрләр үзәк кино йортына юнәлде, анда «Əпипǝ» фильмын карадылар, диелә хәбәрдә.