Яңа елда Казаннан Воронеж һәм Брянскка авиарейслар ачыла
(Казан, 24 декабрь, «Татар-информ»). Киләсе елның 2 гыйнварында Казаннан Воронеж һәм Брянскка яңа авиарейслар ачыла. Ике юнәлеш буенча да очышлар атнага ике тапкыр башкарылачак. Бу хакта Казан аэропортының матбугат хезмәте хәбәр итә.
Татарстан башкаласыннан Воронежга самолетлар сишәмбе һәм пәнҗешәмбе көннәрендә 21 сәгать 15 минутта очачак һәм 22 сәгать 45 минутта барып җитәчәк. Кире кайту чәршәмбе һәм җомга көннәрендә 3 сәгать 35 минутта була һәм Казанга 5 сәгать 10 минутта кайтып төшә.
Сишәмбе көннәрендә Казаннан Брянскка очу 14 сәгать 10 минутка билгеләнгән һәм 16 сәгать 10 минутта барып җитә. Брянсктан самолет 11 сәгать 20 минутта оча һәм Казанда 13 сәгать 20 минутта төшеп утыра.
Пәнҗешәмбе көннәрендә авиалайнер Казаннан 14 сәгать 50 минутта кузгалып, Брянскка 17.00 сәгатьтә килеп җитәчәк. Кире юнәлештә самолет 12 сәгать 10 минутта оча һәм Татарстанда 14 сәгать 10 минутта төшә.
«Әлеге расписание буенча очышлар программасы 2020 елның март ахырына кадәр планлаштырылган», - диелә матбугат хезмәте хәбәрендә.
Казан — Воронеж юнәлеше буенча очыш озынлыгы 1 сәгать 35 минут, Казан — Брянск маршруты буенча 2 сәгать тәшкил итәчәк.