Татарстанда үсмерләр өчен нинди вакансияләр һәм күпме хезмәт хакы вәгъдә итәләр?
Татарстанда бу җәйдә 16 меңнән артык яшүсмер эшкә урнашачак, дип фаразлый ТР Хезмәт министрлыгы. Яшьләр сезонга күпме акча эшли ала, эш бирүчеләр аларга нинди вакансияләр тәкъдим итә һәм ни өчен хезмәт килешүе төзергә кирәк – «Татар-информ» материалында.
Фото: © «Татар-информ», Владимир Васильев
Эш бирүчеләр тәҗрибәсез яшь эш эзләүчеләрне нинди позицияләргә алырга әзер
ТР Хезмәт министрлыгы фаразлары буенча, җәй көне Татарстанда 14-18 яшьлек 16,3 мең яшүсмер эшкә урнаштырылачак, бу узган ел белән чагыштырганда 3,5 меңгә күбрәк. Һәм бу «2024-2027 елларга ТР яшьләрен эш белән тәэмин итүгә ярдәм» программасы буенча рәсми мәгълүматлар. Аның буенча яшьләр буш эш урыннарына урнаша. Балаларга эшкә урнашуда ТР Хезмәт министрлыгы, «Беренчеләр хәрәкәте» гомумроссия балалар һәм яшьләр хәрәкәтенең һәм «Россия Студентлар отрядлары» яшьләр оешмасының төбәк бүлекчәләре ярдәм күрсәтә.
Хезмәт министрлыгы мәгълүматлары буенча, Татарстаннан мәктәп укучыларына иң күп вакансияләрне туклану өлкәсе, кунакханә тармагы, мәктәпкәчә һәм медицина учреждениеләре тәкъдим итә. Балалар «Казанкомпрессормаш», «Түбән Кама электр челтәрләре», КАМАЗ, «Татнефть – Забота» оешмасы, шәһәрнең төзекләндерү хезмәтләрендә дә эшләячәкләр.
Вакансияләрнең «ирекле» базарында белдерүләрнең күп өлеше курьерларга туры килә.
«Эш бирүчеләр барыннан да бигрәк курьерларга мохтаҗ – бүген аларга барлык тәкъдимнәрнең дүрттән бер өлеше туры килә. Монда эш тәҗрибәсе дә соралмый һәм бу эшкә 14 яшьтән башлап эш эзләүчеләр урнаша ала. Шулай ук кассирлар һәм сатучы-консультантлар (17 процент), комплектлаучылар (12 процент) һәм промоутерлар ( 7 процент) кирәк», - дип сөйләде «hh.ru Поволжье» директоры Альбина Солтанова.
Кагыйдә буларак, эш бирүчеләр яшүсмерләргә өлешчә мәшгульлек тәкъдим итә. Мондый вакансияләрнең 71 проценты өстәмә акча эшләүгә туры килә. Тәкъдимнәрнең тагын 13 проценты стажировка үтүне күздә тота. Казанлылар үзләрен стажер сыйфатында пешекче, курьер, социаль хезмәткәр яки дизайнер ролендә сынап карый ала.
Фото: © «Татар-информ», Владимир Васильев
Яшьләр үзләре кайда эшләргә тели
Hh.ru уздырган тикшеренү нәтиҗәләреннән күренгәнчә, узган елда Россиядә яшүсмерләрнең 20 проценты җәй көне официантлар булып эшләргә ниятләгән. Шулай ук курьер һәм склад хезмәткәре (10 процент) вакансияләре популяр булган. Мәктәп укучыларының 9 проценты фрилансерлар, ә 7 проценты сатучы эшен эзләгән.
SuperJob.ru матбугат хезмәте мәгълүматлары буенча, Татарстан үсмерләре еш кына түбәндәге позицияләргә дәгъва итә:
- курьер;
- кол-үзәк операторы;
- заказлар җыючы / комплектлаучы;
- клиентлар белән эшләү буенча менеджер;
- җәмәгать туклануы өлкәсе хезмәткәре/официант/бариста.
Фото: © Татар-информ», Владимир Васильев
Сезонлы вакансияләр
Җәйге хезмәт базарында сезонлы бизнес белән бәйле яңа вакансияләр барлыкка килә. Мәсәлән, туңдырма сатучыларга, аттракцион паркларындагы хезмәткәрләргә, самокатларны парковкалаучыларга һәм җәяүле ребалансерларга тәкъдимнәр ачыла, алар электр самокатларын ташу, аларны шәһәрдә парковкалар буенча урнаштыру белән шөгыльләнә.
Җәй көне гадәттәгечә түбәндәге өлкәләрдә персоналга ихтыяҗ арта:
- туризм, кунакханәләр, җәмәгать туклануы;
- китерү сервислары;
- ретейл;
- төзелеш, проектлау, күчемсез милек;
- авыл хуҗалыгы;
- медицина (мәктәп укучылары өчен лагерьлар һәм шифаханәләр медицина хезмәткәрләрен җыялар).
ТР Хезмәт министрлыгы мәгълүматларына караганда, каникул чорында яшьләр ешрак төрле эш башкаручылар, яшел хуҗалык эшчеләре, ЭВМ операторлары, горничный ярдәмчеләре, официантлар һәм пешекчеләр, кладовщиклар, техниклар, администраторлар, вожатыйлар булып эшкә урнаша.
«Татар-информ», Наталья Рыбакова