د ملګرو ملتونو سرمنشي پر طالبانو غږ کړی چې جګړه ودروي
انتونیو ګوتیرش په خپل ټویتر کې د ښځو او نجونو وضعیت ته په هغو سیمو کې چې طالبانو نیولې دي اندېښنه ښکاره کړې، دا یې هم لیکلي دي چې د افغانستان وضعیت ورځ په ورځ د خرابېدو په حال کې دی او د جګړو له امله ډېر ملکیان وژل کېږي په ځانګړي ډول ښځې او ماشومان د دې جګړې قربانیان دي.
ښاغلي ګوتیرش په افغانستان کې له ټولو ښکېلو ډلو هیله کړې ده چې د ملکیانو د خوندیتوب په خاطر خپل مسوولیتونه ادا کړي.
په افغانستان کې د ملګرو ملتونو د مرستندوی دفتر یوناما او د دې سازمان د بشري حقونو د ادارې د یوه ګډ راپور له مخې چې تېره میاشت خپور شو، د روان ۲۰۲۱ کال په لومړۍ نیمايي کې د روانې لسیزې د بل هر کال د لومړيو شپږو میاشتو پرتله په افغانستان کې زیاتې ښځې او ماشومان مړه او ټپیان شوي دي.