پاپ فرانسس په افغانستان، ناروې او بریتانیا کې وروستیو قربانیانو ته دعا وکړه
پاپ پرون د روم په سینټ پیټرز میدان کې وویل، تېره اوونۍ څو بریدونه شوي چې لسګونه کسان پکې وژل شوي دي.
پاپ زیاته کړه:"تېره اوونۍ بېلابېل بریدونه وشول، د بیلګې په توګه په ناروې، افغانستان او بریتانیا کې. یو شمېر خلک مړه او ټپیان شول. زه د قربانیانو خپلوانو ته تسلیت وړاندې کوم او له تاسو څخه غواړم چې د تاوتریخوالي څخه چې تل ناکامۍ له ځانه سره لري لېرې اوسئ هېره مو نه وي چې تاوتریخوالی تاوتریخوالی زیږوي"
د جمعې په ورځ په کندهار کې د شیعه ګانو پر یوه جومات په برید کې لسګونه کسان مړه او ټپیان شول.
ناروې د پنجشنبې په شپه د یوه برید شاهد و چې برید کونکي لږترلږه پنځه کسان په غشي ویشتلي او وژلي.
اخوا د بریتانیا د پارلمان یوغړی هم یوه بریدګر په چاقوګانو وهلی او مړ کړی یې دی.
پاپ فرانسس په خپله وینا کې د وسلو په تولیدونکو او پلورونکو هم غږ وکړ چې خپل فعالیتونه ودروي.