Казан янында Кытай студентлары өчен обсервация зонасы оештырылды
(Казан, 7 февраль, «Татар-информ», Валерия Белова). Казан янында «Ялкын» лагерында Кытай студентлары өчен обсервация зонасы оештырдылар. Ул республикага Кытайның коронавирус чыганагы ачыкланган төбәкләреннән кешеләр килгән очракта санитар саклау планы нигезендә Татарстан Хөкүмәте тарафыннан расланган. Бу хакта «Татар-информ» мәгълүмат агентлыгына Роспотребнадзорның ТР буенча идарәсе җитәкчесе урынбасары Любовь Авдонина сөйләде.
«Бездә территорияне санитар саклау буенча комплекслы план бар. Норматив документлар буенча Татарстан территориясендә авыру йоктыруда шикләнелгән кешеләрне һәм сәламәт кешеләрне изоляцияләргә кирәк булган объектлар билгеләнә. Безнең һәр муниципаль берәмлектә обсервация территориясе бар. Без чума, холера кебек теләсә нинди инфекциягә каршы торырга әзер», — дип аңлатты санитария табибы.
Кытай Халык Республикасы студентлары обсервациядә 14 көн табиблар күзәтүендә булачак, ә аннары укый башлачак.
«Әлегә кадәр Кытайдга кайтып киткән студентларның каникулларын 1 мартка кадәр озайттылар. Ә Татарстанга килгән кешеләр каникул ахырына кадәр медицина күзәтүендә булачак. Бу резервация, изоляция түгел», — диде Любовь Авдонина.