Белгеч: Тромб хасил булу куркынычы янаган кешеләрдә коронавирус авыр формада уза
(Казан, 20 декабрь, «Татар-информ»). Тромб хасил булу куркынычы янаган кешеләрдә коронавирус инфекциясе авыр формада уза. Бу хакта Sputnik радиосы хирург, «Флебология үзәге» клиникасы табибы Амиран Демуровка сылтама белән хәбәр итә.
«Коронавирус вакытында кан ою системасы активлаша. Коронавирус инфекциясеннән тыш тромб барлыкка килү ихтималы булган кешеләрдә куркыныч тагын да арта», — диде Амиран Демуров.
Табиб үз-үзеңне дәвалау белән шөгыльләнмәскә һәм табиб күрсәтмәсеннән башка гына канны сыекландыра торган препаратлар кулланмаска чакырды. Ул антикоагулянтларны контрольсез кабул итү тискәре нәтиҗәләргә китерү ихтималы турында кисәтте.
«Бу эчке кан китү, баш мие яки күзгә кан саву буларак чагылыш табарга мөмкин. Хатын-кызларда исә контрольсез менструаль кан китү буларак күзәтелүе ихтимал. Шунлыктан алтын урталыкны сакларга кирәк», — диде Демуров.