Рөстәм Миңнеханов Мәскәү өлкәсендә Халыкара армия уеннары ачылышында катнашты
(Казан, 23 август, «Татар-информ»). Татарстан Республикасы Президенты Рөстәм Миңнеханов Мәскәү өлкәсендәге Кубинка шәһәрендә «Патриот» хәрби-патриотик паркында 2021 елгы Халыкара армия уеннары һәм «Армия-2021» халыкара хәрби-техник форумы ачылышында катнашты.
Республика Президентының матбугат хезмәте хәбәр иткәнчә, форумда 28 мең берәмлек заманча корал һәм техника — ату һәм артиллерия кораллы, танклар, хәрби авиация тәкъдим ителгән.
Республика Президенты күргәзмә экспозицияләрен карады, Татарстан предприятиеләре стендлары белән танышты. «Россия вертолетлары» холдингы (Ростех дәүләт корпорациясенә керә) экспозициясендә Казан вертолет заводы җитештергән өч винт канатлы машина: Ми-17В-5 һәм Ми-38Т хәрби-транспорты һәм премиум-класслы Aurus Ансат вертолеты тәкъдим ителгән.
«Ак Барс Холдинг» мәйданчыгында Рөстәм Миңнехановка су асты канатларындагы «Метеор-2020» пассажир теплоходы макетын күрсәттеләр, шулай ук Яшел Үзән судно төзелеше заводында тормышка ашырыла торган башка проектлар турында сөйләделәр.