Васил Шәйхразиев Новосибирск Җәмигъ мәчетендә булды
(Казан, 31 октябрь, «Татар-информ»). Бүген ТР Премьер-министры урынбасары, Бөтендөнья татар конгрессының Милли Шура рәисе Васил Шәйхразиев Новосибирск өлкәсенә эш сәфәре кысаларында Новосибирск шәһәре Җәмигъ мәчетендә булды. Бу хакта Бөтендөнья татар конгрессының матбугат хезмәте хәбәр итә.
Аны Новосибирск өлкәсе татарлары милли-мәдәни автономиясе рәисе Әмир Гәрәев һәм Бөтендөнья татар конгрессы җитәкчесе урынбасары Марс Тукаев озатып йөрде. Кунакларны Новосибирск өлкәсе мөфтие, Новосибирск өлкәсе Җирле мөселман дини оешмасы җитәкчесе Сәлим хәзрәт Шакирҗанов каршы алды.
Новосибирск Җәмигъ мәчете 1998 елда төзелгән. Аллаһ йорты үзенең өч манарасы белән игътибарны җәлеп итә. Аның очларын ярымайлар бизи. Үзәк манараның биеклеге – 43, ян-яктагыларыныкы 29 метр тәшкил итә.