Чистайда Павел Самойловның «Туган җир» дип исемләнгән шәхси күргәзмәсе ачылды
(Чистай, 7 февраль, «Татар-информ», «Чистай-информ» , Гүзәл Гомәрова). Чистайда скульптор, үзенчәлекле рәссам Павел Самойловның «Туган җир» дип исемләнгән шәхси күргәзмәсе ачылды. Ул талантлы иҗатчының 75 яшьлек юбилеена багышланган иде.
«Әлеге күргәзмәгә тәкъдим ителгән барлык эшләрне мин узган елның яз һәм көз айларында яздым. Картиналар барысы да яңа, моңа кадәр аларны беркем дә күрмәде. Үз эшләремдә мин туган җиремнең аңлатып булмастай матурлыгын тасвирладым. Барлык эшләр дә дамбада, минем иң яратан урынымда, минем балачагым узган урыннарда ясалды. Миңа аның һәр почмагы таныш», — дип сөйли Павел Ефимович.
Автор әлеге күргәзмәне үз иҗатында билгеле бер этапың символик төгәлләнүе дип саный. Киләчәктә Павел Самойлов Идел буе Болгар дәүләтенә багышланган эшләрнең яңа циклын башларга планлаштыра.
«Мин эшләремнең яңа сериясенә керешәм. Бәлкем киләчәктә этюдларга чыгармын, пленэрларда булырмын, әмма төп көчемне яңа этаптагы иҗатыма юнәлдерәчәкмен», — диде рәссам.
Күргәзмәне ачуга Павел Самойловның хезмәттәшләре, фикердәшләре, музей хезмәткәрләре, укучылары, аның иҗатын яратучылар килде. Күбесе юбилярга бүләк әзерләгән. Павел Ефимович шулай ук күргәзмәгә килүчеләргә ихтирамын белдерде. Ул аларга рәсемнәре сүрәтләнгән һәм шигырь юллары язылган открыткалар әзерләгән.
Шунысын билгеләп үтәргә кирәк, «Туган җир» күргәзмәсе 15 мартка хәтле эшләячәк.