Рөстәм Миңнеханов Камилә Вәлиеваны Олимпиадада команда турнирында җиңү белән котлады
(Казан, 7 февраль, «Татар-информ»). Татарстан Президенты Рөстәм Миңнеханов Камилә Вәлиеваны Пекин Олимпиадасында фигуралы шуу буенча команда турнирында җиңүе белән тәбрикләде.
Мондый җиңүләр — зур осталык кына түгел, ә үз-үзең һәм бөтен команда алдында җаваплылык нәтиҗәсе дә, дип искәртте ул.
«Фигуралы шууны яратучы татарстанлылар исеменнән, шәхсән үз исемемнән сине Олимпия чемпионы исеме һәм иң югары дәрәҗәдәге ярышларда беренче ышанычлы җиңүең белән ихластан котлыйм», — диелә Татарстан җитәкчесе котлавында.
Президент билгеләп үткәнчә, Вәлиева куелган барлык бурычларны да яхшы үтәде һәм хатын-кызлар төркемендә дүртле сикерүне башкарган беренче спортчы булды.
«Бу мөһим шәхси һәм уртак зур триумф хисләре сине яңа чыгышларга һәм ышанычлы җиңүләргә рухландырсын. Бары тик алга гына, боздагы яшь королевабыз, бары тик син генә булдыра алганча — жюри әгъзалары өчен төгәл һәм нәзакәтле, көндәшләрең өчен буй җитмәслек матур, фигуралы шууны сөюче миллионлаган кешеләр өчен тылсымлы итеп», — ди Рөстәм Миңнеханов.
Соңыннан ул Вәлиевага уңышлар һәм яңа җиңүләр теләде.