Илдар Низамов вафат булу сәбәпле, «Татмедиа» җитәкчелеге кайгы уртаклашты
(Казан, 27 февраль, «Татар-информ»). Илдар Низамов милли журналистика теориясе өлкәсендә Татарстанның әйдәп баручы белгече иде. Казан федераль университетның профессоры, журналистларның берничә буынының остазы булды, диелә «Татмедиа» акционерлык җәмгыяте җитәкчелегенең кайгы уртаклашу телеграммасында.
«Ул гаҗәеп хезмәт сөючәнлеге белән аерылып торды, үз эшенең чын профессионалы, үз эшенә бирелгән һәм хөрмәтле кеше иде <…> Илдар Низамов безнең йөрәкләрдә мәңгегә калачак. Без аның туганнары һәм якыннары белән бергә кайгырабыз», — диелә текстта.
Укучылары профессорның «чиста» татар телен кулланырга, калькалардан качарга, үз эшләренә мәхәббәт белән карарга өйрәткәнен искә ала. «Ул гыйбарәләрне җентекләп тикшерде, текстлардагы сүзгә таләпчән карады», — дип билгеләп үтә алар.
Илдар Низамов каты авырудан соң 85 яшендә вафат булды . Ул соңгы елларда туган ягы — Әтнә районының Олы Бәрәзә авылында яшәде.
«Матбугатның тәэсирле сүзе» монографиясенең авторы, моннан тыш аның утыздан артык китабы һәм кулланмасы, 200 гә якын фәнни мәкаләсе дөнья күрде.