Зәй фотографы мобилизацияләнгән егетләргә теләктәшлек итеп видеороликлар ясый
Илдә мобилизация игълан ителгәч, районыбыз халкы да хәрбиләргә ярдәм итү өчен берләште. Һәркем гомуми җиңүгә зур булмаса да, үзеннән өлеш кертергә тырыша. Зәйдә танылган профессиональ фотограф Инесса Раббаниева мобилизацияләнгән зәйлеләргә һәм аларның гаиләләренә теләктәшлек итү йөзеннән видеороликлар иҗат итә. Аның социаль челтәрдә өч видеоролигы дөнья күрде инде. Бу турыда «Зәй офыклары» хәбәр итә.
«Мобилизация, хәтта өлешчә генә булса да, һәр гаиләгә диярлек кагылды. Безнең батыр егетләребез өчен йөрәге сыкрамаган кеше юктыр. Зәйлеләр актив рәвештә гумантар ярдәм җыя. Әлеге изге эштән мин дә читтә калмадым, үземнән матди ярдәм кертергә тырыштым. Ләкин иҗатка гашыйк кеше буларак, бу гына аз кебек тоелды. Шул рәвешле, мобилизацияләнгән егетләребезгә багышлап видео ясарга уйладым», – дип сөйләде ул.
«Танышларым, дусларым үзләренең социаль челтәрләрендә әлеге темага кагылышлы бик күп фото, видеолар белән уртаклашты. Моннан тыш, үземнең дә ике якын танышым махсус хәрби операциягә чакыру алды. Аларның берсе хәзер хәрби операция зонасында, икенчесе әлегә Казанда хәрби өйрәнүләр үтә. Танк полигоныннан видеоязмалар белән дә уртаклашты ул», – диде фотограф.
Шулай итеп, фотограф шактый материал туплаган һәм әлеге өлкәдәге беренче иҗат җимешем дөнья күргән. Ул аны мобилизация үтүче танышларына, аларның туганнарына шәхсән үзләренә генә җибәргән. Социаль челтәрләрдә урнаштырырга уйламаган. Шуңа да карамастан, махсус операциягә алынган егетләрз әлеге видеоны зәйлеләр күрергә тиеш дигән фикергә килгән.
Фотограф видеоны үз аккаунтына урнаштырганнан соң, бик күп рәхмәт сүзләре килгән. Видеоны берничә мең кеше караган. Моннан тыш, яңа фотолар белән уртаклашучылар саны арткан. Ә Казандагы егетләр үзләренең тормыш-көнкүрешләрен телефонга төшереп, аңа җибәргән. Шул рәвешле, берничә көн эчендә икенче һәм өченче видео әзер булган.
«Иҗатым йөрәктән йөрәккә барып җитүенә мин чиксез шат. Чын күңелдән егетләребезнең исән-имин туган якларына әйләнеп кайтуларын телим. Алар безгә бик кирәк! - ди Инесса.