21 сентябрьдән башлап килешү төзегән хәрбиләргә 195 мең сум акча түләү тәртибе расланды
Премьер-министр Михаил Мишустин махсус хәрби операция барган вакытта РФ Кораллы Көчләре белән бер елга һәм аннан артыграк чорга килешү төзегән хәрби хезмәткәрләргә бер тапкыр түләнә торган акча бирү тәртибен раслады. Бу хакта «Российская газета» яза.
Ноябрь башында Россия Президенты Владимир Путин үзенең указы белән аларга 195 мең сум пособие бирү турында карар чыгарган иде. Әлеге акчалар 2022 елның 21 сентябреннән башлап килешү төзегән хәрбиләргә түләнәчәк.
Пособиене алу өчен хәрби хезмәткәр хәрби часть командирына рапорт бирергә тиеш. Анда бер тапкыр бирелә торган акчалата түләүнең атамасы, аның күләме, түләү өчен нигез һәм килешү төзелгән вакыт күрсәтелә. Рапортка килешүнең күчермәсе беркетелергә тиеш.
Хәрби часть командиры 10 эш көне эчендә пособиене түләү турында боерык чыгара, ә Саклану министрлыгының финанс-икътисад органнарына боерыкны үтәү өчен тагын 10 көн вакыт бирелә.