Татарстан җитәкчелеге Гүзәл Шакированың вафатына бәйле рәвештә кайгы уртаклашты
ТР Министрлар Кабинетының Сәламәтлек саклау, спорт һәм сәламәт яшәү рәвешен формалаштыру мәсьәләләре идарәсе башлыгы, Татарстанның атказанган физкультура һәм спорт хезмәткәре Гүзәл Шакирова вафат булды. Республика җитәкчелеге зур югалту кичерә, диелә ТР җитәкчелеге тарафыннан мәрхүмәнең туганнары һәм якыннарына юлланган кайгы уртаклашу телеграммасында.
Кайгынамәдә әйтелгәнчә, Шакирова күп кенә мәсьәләләргә кураторлык итте, аның катнашында халыкара, Бөтенроссия һәм республика күләмендәге чаралар, аерым алганда, 2015 елда спортның су төрләре буенча XVI дөнья чемпионаты, 2017 елда Конфедерацияләр кубогы (FIFA), 2018 елда Футбол буенча дөнья чемпионаты (FIFA) үткәрелде. Моннан тыш, ул Татарстанда коронавирус инфекциясенә каршы көрәшкә сизелерлек өлеш кертте.
«Ул республиканың медицина, спорт, туризм һәм яшьләр җәмәгатьчелеге арасында зур хөрмәт казанды. Аны принципиальлек, әдәплелек, кеше хәленә керү һәм кешелеклелек кебек сыйфатлар башкалардан аерып торды», - диелә кайгынамәдә.
Некрологны Татарстан Премьер-министры Алексей Песошин, ТР Президенты Аппараты җитәкчесе Әсгать Сәфәров, ТР Министрлар Кабинеты Аппараты җитәкчесе Шамил Гаффаров, ТР вице-премьеры Ләйлә Фазлыева, ТР Дәүләт Советы секретаре Лилия Маврина, ТР Президенты ярдәмчесе Равил Моратов, ТР сәламәтлек саклау министры Марат Садыйков, ТР спорт министры Владимир Леонов, ТР хезмәт, халыкны эш белән тәэмин итү һәм социаль яклау министры Эльмира Зарипова, ТР яшьләр эшләре министры Тимур Сөләйманов, ТР Туризм буенча дәүләт комитеты рәисе Сергей Иванов, Россия Кулланучы хокукларын яклау һәм кеше иминлеге өлкәсендә күзәтчелек федераль хезмәтенең (Роспотребнадзор) ТР буенча идарәсе җитәкчесе Марина Патяшина имзалаган.
Гүзәл Шакирова белән хушлашу мәрасиме 30 декабрьдә 10.00 сәгатьтә «Гаилә» мәчетендә узачак, мәрхүмәне «Курган» комплексы территориясендә җирләячәкләр.
«Татар-информ» агентлыгы ТР Министрлар Кабинетының Сәламәтлек саклау, спорт һәм сәламәт яшәү рәвешен формалаштыру мәсьәләләре идарәсе башлыгы Гүзәл Шакированың 53 яшендә вафат булуы хакында элегрәк хәбәр иткән иде.