Ураза гаете көнне Казанда «Гает моңы» бәйрәме була
21 апрельдә – Ураза гаете көнне – Казанның «Чулпан» мәдәният үзәгендә «Гает моңы» бәйрәме узачак. Ул «Рухи моң» татар рухи мәдәниятне үстерү фестиваль-бәйгесенең гала-концерты да була, анда бәйгегә нәтиҗәләр чыгарылачак. Бу турыда Татарстан Диния нәзарәте хәбәр итте.
Быел фестиваль Татарстанда игълан ителгән Милли мәдәниятләр һәм гореф-гадәтләр елы кысаларында «Рухи моң» иҗат берләшмәсе, Татарстан мөфтияте, Ислам динен кабул итүгә 1000 ел исемендәге мәдрәсәсе тарафыннан дүртенче тапкыр оештырылды. Мәгълүмати партнер – «Тәртип» радиосы.
Бәйге татар мәкаме һәм традицион мелодика калыпларын кайтаруны, татар халкының нигез кыйммәтләрен үз эченә алган рухи җыр жанрын баетуны, татар мәкаме белән азан әйтү культурасын булдыруны, татар теленең кулланылыш даирәсен арттыруны максат итеп куя.
2023 елның февраль башында игълан ителгән конкурс «Дини җыр», «Мөнәҗәт», «Милли мәкам белән азан әйтү», «Вәгазь cөйләү» номинацияләрендә читтән торып үткәрелде. Пермь крае, Самара, Башкортстан, Курган, Төмән, Мәскәү, Чувашия, Омск һәм Татарстаннан 200 гә якын видеоязма кабул ителде. Аларның күпчелеге «Мөнәҗәт» номинациясенә юлланган.
Чарага ир-атларга – түбәтәйдән, хатын-кызларга яулыктан килергә киңәш ителә. Милли образда килгән тамашачылар арасында бүләк уйнатылачак, диелә хәбәрдә.