Рәми Гариповка багышланган «Шагыйрь көндәлеге» фильмы халык дипломатиясе бүләген алды
Башкортстан режиссеры Булат Йосыповның халык акчасына төшерелгән «Шагыйрь көндәлеге» фильмы Мәскәүдә халык дипломатиясе бүләген алды. Искәртик, фильм-байопик Башкортстанның халык шагыйре Рәми Гариповка багышланган. Аны төшерү өчен акча җыю игълан ителде.
«Шагыйрь көндәлеге» тарихи фильмы кинофестивальдә «Россия киносы» программасында күрсәтелде. Фильмның премьерасы Мәскәүдә Үзәк Кино йортының Зур залында һәм Уфада узды. Фильм шулай ук күптән түгел Уфада «Үз юлым» халыкара фестивалендә җиңүче булды. Бу хакта «Башинформ» хәбәр итә.
«Фильм төшерә башлаганда акча юк иде. Без халыктан акча җыю турында игълан иттек, миллион сумнан артык акча җыелды һәм сынау өчен беренче кадрларны төшердек. Күп йөрдек, сценарийлар яздык, объектларны сайладык. Аннары без программада катнашу өчен гариза бирдек, киностудиягә, хөкүмәткә мөрәҗәгать иттек. Өч елда фильмның гомуми бюджеты 23 млн сум булды», - дип сөйләде Булат Йосыпов.
«Башинформ» «Шагыйрь көндәлеге» фильмының рус телендәгесе республика кинопрокатына 13 апрельдә чыгуы турында хәбәр итте.