Володин илдән киткән россиялеләрне кире кайтырга чакырды: Башны эшләтергә вакыт җиткәндер
2022 елда илдән киткән россиялеләрнең яртысыннан артыгы кире кайткан. Калганнарына да чит илдәге перспективаны аек акыл белән бәяләргә һәм өйләренә кайтырга кирәк, ди Дәүләт Думасы Рәисе Вячеслав Володин.
«Кемдер гаилә, якын кешеләр, дуслар, туган тел кайда булса, өе дә шунда булуын аңлагандыр, мөгаен. Кемдер Россиядәге кебек яшәү шартларын бик аз илләр генә тәкъдим итә алуын танып уңайлы тормышка кире кайтырга булгандыр. Кемгәдер Көнбатыш илләренең русофобия сәясәте йогынты ясагандыр», - дип искәрткән ул телеграм-каналда, ватандашларның кире кайту сәбәпләрен бәяләп.
Володин билгеләп үткәнчә, күпләр киткән вакытта үзләрен чит илдә нәрсә көтүе турында уйламаган яки «тыныч кына качып утырырга» өметләнгән. Әмма «икенче сортлы» дип карау, мәктәптә балаларга каныгу һәм әлеге ил хакимиятләренең Россия предприятиеләрен махсус рәвештә банкротлыкка чыгаруы аларны карарын үзгәртергә мәҗбүр иткән.
«Шундый сүзләрдән соң әле дә булса Көнбатыш илләрендә калган гражданнарга кая китүләре, нәрсә табулары һәм алда ни көтүе хакында уйланырга кирәк. Бүгенге хәлләрне исәпкә алып, башны эшләтергә вакыт җиткәндер: бүген кире кайту мөмкинлеге бар әле, ә иртәгә ул булмаска да мөмкин», - дигән ул һәм Чехия Президентының чит илдәге барлык россиялеләрне концлагерьларга җибәрергә кирәк дигән тәкъдимен искә төшергән. Бу турыда «Татар-информ» хәбәр итә.