Эльмир Низамовның фортепиано әсәрләреннән торган яңа альбомы чыккан
Композитор Эльмир Низамовның фортепиано әсәрләреннән торган яңа альбомы дөнья күргән. Альбомда композиторның берничә ел дәвамында иҗат иткән әсәрләре тупланган. Ул «Elmir Nizamov – Piano Works» дип атала. Бу хакта татарча альтернатив музыка ясаучы Yummy Music инди-лейбл хәбәр итә.
«Фортепиано минем өчен һәрвакыт илһам чыганагы булып торды», — ди Эльмир Низамов. Альбомда җырларның күбесе тыңлаучыга таныш булыр, араларында яңалары да бар», – дип сөйләде лейбл командасы.
Шулай ук Yummy Music лейблы тагын бер премьера тәкъдим итә. «Гүзәллек» дип аталган җырны Азат Гыймадиев белән Ilgiz – Илгиз Шәйхразиев башкара.
«Татар инди-сәхнәсенең ике романтигыннан җиңел җәйге җыр. Матурлыкны һәрнәрсәдә табып була — җыр шул турыда. Сүз һәм көй авторы — Азат Гыймадиев үзе. Җырны җәй буе Казанның парклары һәм скверлары плейлистында, шулай ук, «Сәләт» хәрәкәте аланнарында ишетеп булачак», – дип хәбәр итә лейбл командасы.
Альбом һәм җырларны музыкаль мәйданнарда тыңлап була.