«Алабуга» һәм «Химград» үз проектларын Каракалпакстанда урнаштырырга мөмкин
Татарстан Рәисе Рөстәм Миңнеханов Каракалпакстанның элеккеге территориаль мамык терминалы биналарын карады. Ул «Алабуга» махсус икътисад зонасы һәм «Химград» акционерлык җәмгыятенә мәйданчыкларның потенциалын өйрәнергә һәм бу территориядә урнаштырырга мөмкин проектларны карарга кушты. Бу хакта Татарстан җитәкчесе матбугат хезмәте хәбәр итә.
Ул 7 мең метрга якын мәйданны биләп тора. Аның урнашу урыны отышлы —Нукус шәһәре үзәге һәм тимер юл тармагы янында.
«Энергия ресурслары булу, мәйданнарның җитәрлек саны, отышлы салым режимы һәм, иң мөһиме, эшче кадрлар — әгәр бу база булса, эшләп була», — дип билгеләп үтте Татарстан Рәисе.
Бу мәйданчыкта эшләү өчен тагын бер мөһим момент — кадрлар әзерләү өчен белем бирү үзәге оештыру.
Йомгаклап, Рөстәм Миңнеханов эшче төркем төзергә һәм тиешле тәкъдимнәр кертергә кушты.
Исегезгә төшерәбез, Миңнеханов Үзбәкстанга кичә килде. Татарстан делегациясенең планнарында —предприятиеләргә бару, шулай ук Каракалпакстан җитәкчелеге белән очрашу. Беренче булып ул бүген Prime electric engineering предприятиесендә булды.