Татарстанда реаль хезмәт хаклары 13,3 процентка арткан
2023 елның гыйнварыннан ноябренә кадәр Татарстан предприятиеләре һәм оешмалары хезмәткәрләренең, шул исәптән кече эшмәкәрлек субъектлары хезмәткәрләренең реаль хезмәт хакы узган елның шул ук чоры белән чагыштырганда 13,3 процентка арткан. Ул Дәүләт статистикасы буенча федераль хезмәтнең Татарстандагы территориаль органы (Татарстанстат) мәгълүматларыннан күренә.
Узган елның гыйнвар-ноябрь айларында уртача айлык номиналь хезмәт хакы 59 994,2 сум тәшкил иткән, 2022 елның шул ук чоры белән чагыштырганда ул 18,7 процентка арткан.
Шул ук вакытта ноябрь аен аерым алганда, татарстанлыларның реаль хезмәт хакы октябрь белән чагыштырганда 2,6 процентка һәм еллык күрсәткечтә 13,6 процентка арткан. Ноябрь өчен номиналь хезмәт хакы октябрь белән чагыштырганда 3,5 процентка һәм елга карата 16,3 процентка артып, 64 658,5 сум дәрәҗәсенә җиткән.
2023 елның унбер ае нәтиҗәләреннән чыгып караганда, иң аз хезмәт хакы кунакханә һәм җәмәгать туклануы учреждениеләрендә эшләүчеләргә исәпләнгән (36 387,7 сум, республика уртача дәрәҗәсеннән 39,3 процентка түбәнрәк). Иң югары хезмәт хаклары — файдалы табигый казылмалар чыгару тармагында эшләүчеләрдә (94 559,4 сум, республика уртача дәрәҗәсеннән 57,6 процентка югарырак).
Элегрәк «Татар-информ» хәбәр иткәнчә, Казан шәһәре югары хезмәт хакы алу мөмкинлеге булган мегаполислар бишлегенә һәм алырга теләгән хезмәт хакы күләме ягыннан Россия шәһәрләренең беренче бишлегенә кергән. Россия Президенты Владимир Путин 2023 елда Россиядә реаль хезмәт хакы үсешен 7,7 процент дип бәяләде.