Туркиянинг KAAN қирувчи самолёти илк парвозини амалга оширди (видео)
Фото: Getty Images
Туркия мудофаа саноати ва ҳарбий авиация портали SavunmaSanayiST Туркиянинг бешинчи авлод қирувчи самолёти KAAN илк парвозини амалга оширганини маълум қилди. Бу ҳақда “РИА Новости” хабар берди.
Парвоз синовлари декабрь ойининг охирига режалаштирилган эди, бироқ бир неча бор қолдирилган.
“KAAN миллий жанговар самолёти ўзининг илк парвозини амалга оширгани маълум бўлди”, — дейилади порталнинг Х ижтимоий тармоғидаги саҳифасида.
Туркия расмийлари ҳозирча расмий изоҳ бермаган. Ўтган йилнинг май ойида Туркия президенти бешинчи авлод миллий жанговар самолётининг номини KAAN деб эълон қилган эди.
Эрдўғон самолётнинг энг сўнгги технологиялар билан жиҳозланганини, юқори манёвр ва нишонга олиш аниқлигига эга эканлигини таъкидлаган. Туркия армияси биринчи қирувчи самолётни 2028 йилда қабул қилиши режалаштирилган.