Кызыл чөгендер белән кишерне кайчан алырга?
Татарстан Россиянең урта полосасына керә. Биредә кызыл чөгендер белән кишерне сентябрьнең икенче яртысында – октябрь башында алалар. Бу турыда «Челнинские известия» хәбәр итә.
Уңышны һава торышына карап җыялар. Температура нуль градуска кадәр төшкәнче, кызыл чөгендерне алырга кирәк. Кишер исә -2..-3 градус салкыннан курыкмый. Яшелчәләрне коры көнне алсаң, алар озаграк сакланыр.
Кишер яфраклары саргая, шиңә башласа, кишердә җепсыман тамырчалар барлыкка килсә, аны алырга вакыт җитте дигән сүз.
Өлгергән кызыл чөгендердә зур булмаган күпереп торган урыннар барлыкка килә, диелә хәбәрдә.