Рөстәм Миңнеханов «КАМАЗ» заводының беренче директорын туган көне белән котлады
(Казан, 7 февраль, «Татар-информ»). Татарстан Президенты Рөстәм Миңнеханов «КАМАЗ» компаниясенең беренче директоры Лев Васильевны туган көне белән котлады. Аңа бүген 97 яшь тулды. Республика җитәкчесе аның белән телефоннан сөйләште. «Элеккеге фронтовик 12 ел „КАМАЗ“ заводы белән җитәкчелек иткән. Бу чорда нульдән автогигант төзегән, заводның уникаль кадрлар потенциалын булдырган, Чаллыга бөтен илдән иң яхшы белгечләрне җәлеп иткән», — диелгән Татарстанның Россиядәге Тулы вәкаләтле вәкиллеге матбугат хезмәте хәбәрендә.
Үз хезмәте өчен компаниянең беренче җитәкчесе «Социалистик Хезмәт Герое», Ленин ордены һәм «Урак һәм чүкеч» алтын йолдызы белән бүләкләнде. Васильев шулай ук «Москвич» заводының генераль директоры булган, аның беренче автомобильләрен булдыруда катнашкан һәм СССРның Җиңел һәм азык-төлек сәнәгате һәм көнкүреш приборлары өчен машина төзелеше министрлыгын җитәкләгән.