Гүзәлия Гыйниятуллина «Татар кызы» бәйгесендә җиңүчеләр ничек сайланачагы турында сөйләде
Бүген Казанның «Пирамида» күңел ачу комплексында республикакүләм «Татар кызы-2022» бәйгесенең финалы узачак. «Татар кызы» Халыкара конкурсы дирекциясе башкарма директоры Гүзәлия Гыйниятуллина «Татар-информ» хәбәрчесенә җиңүчеләр ничек сайланып алачагы турында сөйләде.
«Кызлар бер ай дәвамында сәхнә осталыгы, хореография буенча әзерлек үтте. Төрле шәхесләр белән очрашулар, аш-су осталыгы, интеллектуаль этап булды. Шуларның нәтиҗәсендә баллар куела. Шулай ук, шоу-тамашада жюри да үз бәясен әйтәчәк.
Шунысын төгәл әйтәм: «Татар кызы» һәм «Казан гүзәле» исеменә шәхес булган һәм үз-үзен күрсәтә белгән кызлар лаек була», - диде Гүзәлия Гыйниятуллина.
Ул проектның максатлары һәм оештыру комитетының киләчәккә булган планнары белән дә уртаклашты. «Без заманча татар кызларын гаиләсен дә, яраткан шөгылен дә тигез алып бара алган шәхесләр итеп күрсәтәбез», - диде Гүзәлия Гыйниятуллина.
«Кызлар белән ел дәвамында күрешеп торсак та, глобаль хыялларыбыз да бар - мәгариф проектлары, ел дәвамында бара торган мәктәп булдыру. Теләгән һәр кыз катнаша алырлык «Татар кызы» курслары оештыру да отышлы булыр иде», - дип сөйләде Гүзәлия Гыйниятуллина.
«Татар кызы-2022» финалында ун районнан унбер кыз «Татар кызы» һәм «Казан гүзәле» исемнәре өчен көч сынаша. Җиңүчеләр бүген «Пирамида»да узачак финал тамашасында ачыкланачак.
«Татар-информ» мәгълүмат агентлыгы бәйгене туры эфирда күрсәтәчәк.