Самара татарлары остазбикә Сания Мингачеваны искә ала: Тик игелек кенә кылып яшәде
Самара татарларының «Бердәмлек» газетасында Наилә Хөсәенованың «Тик игелек кенә кылып яшәде…» дигән язмасы чыкты.
2023 елның 26 мае Самара мөселманнарына тирән кайгы алып килде — Сания Вагыйз кызы Мингачева фани дөнья белән хушлашты. Самара татарлары арасында аны белмәгән кеше юктыр. Сания остабикәнең тормыш юлы барыбызга да үрнәк булырлык. Йөзләгән шәкертләренә дини гыйлем биргән остазыбыз соңгы сулышыбызга кадәр иң кадерле кеше булып йөрәкләребездә калачак, ә көләч йөзе һәрвакыт күз алдыбызда булыр.
Сания абыстай, тирән дини белем иясе һәм таләпчән мөгаллим булуына карамастан, кеше йөрәгенә юл табып, йомшак һәм урынлы сүзләре белән һәркемнең күңелен дәвалый белә иде.
Сания ханым белән соңгы мәртәбә сөйләшеп утырганда, ул ничектер үзенең тормыш юлын исенә төшерә башлады.
1992 – 1996 елларда, хәләл җефете Габделәхәт Фоат улы Мингачев белән бергә, әле бик яшь булуларына карамастан, Похвистнево районы, Гали авылының Урта мәчетендә ислам дине нигезләрен укыта башлыйлар. Бөтен көчләрен һәм туплаган белемнәрен җигеп, олыларны һәм балаларны дингә өндиләр. Мәктәптә, мәчеттә, мәдрәсә төзелгәч – анда, көндез дә, кичен дә укулар оештыралар.
«Без ул вакытта Габделәхәт белән бөтен авыл халкына да дини гыйлем бирү теләге белән яши идек», — дип сөйләгән иде Сания ханым. Гали авылы халкы аларны бүген дә хөрмәт белән искә ала.
Динле гаиләдә тәрбияләнгән Сания ханымның тормыш юлы башка юлдан китәргә мөмкин дә түгел иде. Әтисе Вагыйз хәзрәт Яруллин һәм әнисе Асия абыстай балаларын да әхлаклы һәм динле итеп тәрбияләгәннәр.
Медицина училищесын тәмамлагач, Сания ун ел дәвамында кан алу станциясендә эшли. Шул арада ул Габделәхәт Мингачевка кияүгә чыга, матур гына яши башлыйлар. Бераздан икәүләшеп Бохарага дин белеме алырга китәләр. Укып кайткач, алдарак искә алып үткән Гали авылы мәдрәсәсен ачуга күп көчләрен куеп, шунда хезмәт итәләр. Берничә ел эшләгәннән соң, 1996 – 2003 елларда Согуд Гарәбстанына барып, белемнәрен камилләштереп кайталар. Сания ханымның остазлык сыйфатларын ишетеп белгән кешеләр аның чит илдән кайтуын зарыгып көттеләр. Кайту белән ул Җәмигъ мәчетендә балалар һәм хатын-кызлар өчен гарәп графикасы, Коръән уку тәртибе, дин тарихын өйрәнү дәресләре уздыра башлый. Сания ханымның күңеле, йөрәге аша үткән йөзләгән шәкертләре ислам динен тирәнтен өйрәнеп, намазга басалар, үз гаиләләренә дә дини тәрбия бирәләр.
Сания остазыбыз хаҗга бару бәхетенә ирешкән кеше.
Соңгы көненә кадәр ул мәчеттә укытуын туктатмады. Шәкертләренә, мәчеткә килгән кешеләргә белемен биреп калдырырга тырышты.
Менә шундый гаҗәеп шәхес иде ул Сания остазыбыз Мингачева. Бөтен шәкертләре, дуслары, аның нурлы йөзен күргән һәм аз гына аралашудан да гыйбрәт алган кешеләрнең изге догалары аның рухына барып ирешсен иде. Урының җәннәттә булсын, кадерле остазыбыз! Сез тик игелек кенә кылып яшәдегез. Шул игелекләрегез өчен Аллаһы Тәгалә меңләтә савабын өстәп, әҗерен бирсен!
Сүзләремә өстәп тагын шуны әйтәсем килә: Яруллиннар һәм Мингачевлар гаиләләре бөтенләй чит-ят кешеләргә дә ярдәм итеп яшәгәннәр һәм яшиләр дә. Хәтта бер белмәгән ятим карчыкны үз гаиләләренә алып, озак еллар тәрбияләп, соңгы юлга кадерләп озатканнарын беләбез. Савабын күрергә насыйп булсын.