Татарстанда мөселман уку йортларына сәдака һәм зәкят бирү өчен онлайн-хезмәт эшли
Татарстан Диния нәзарәтенең «Зәкят» Хәйрия фонды Татарстанның мөселман уку йортларына финанс ярдәм күрсәтү өчен онлайн-хезмәт ясады.
Онлайн-сервис «Мәдрәсәгә игелек кыл – Сделай добро для медресе» исеме белән Фондның сайтында урнаштырылды һәм республикадагы 8 мәдрәсә, РИИ һәм КИУ файдасына читтән торып сәдака һәм зәкят бирү мөмкинлеген тудырды. Бу турыда Диния нәзарәтенең матбугат хезмәте хәбәр итте.
Теләгән һәркем әлеге уку йортлары үсешенә матди яктан ярдәм итә ала. Моның өчен сервиста аларның берсен сайлап алып, акчаны җибәрергә була. Хәйрия акчалары мәдрәсәләрнең матди тәэмин ителешенә, мөгаллимнәр һәм шәкертләр файдасына, кирәкле әдәбият, биналарны төзекләндерү, ашатуны оештыруга юнәлтеләчәк.
Остазлар һәм шәкертләргә сәдака бирү аеруча саваплы гамәлләргә керә, чөнки Аллаһы юлында гыйлем алу һәркем өчен фарыз булып тора, ә аны тарату һәм укыту Кыямәт көнендә олы дәрәҗәдә әҗерләргә лаек итә, диелә хәбәрдә.
Татарстанның мөселман уку йортлары дини белгечләрне бөтен Россиянең мөселман җәмәгатьчелеге файдасына әзерли: биредә татар, рус һәм гарәп телле имамнарны һәм мөгаллимнәрне, мөселман, иҗтимагый, дәүләт оешмалары, дөньяви һәм дини уку йортлары өчен кадрларны укыталар.
«Мәдрәсәгә игелек кыл – Сделай добро для медресе» сервисы аша сәдакалар түбәндәге уку йортлары хисабына җибәрелә:
- Әлмәт мәдрәсәсе
- Буа мәдрәсәсе
- Казанның Исламны кабул итүнең 1000 еллыгы исемендәге мәдрәсә
- Казанның «Мөхәммәдия» мәдрәсәсе
- Кукмара мәдрәсәсе
- Мамадыш мәдрәсәсе
- Урыссу мәдрәсәсе
- Яр Чаллы мәдрәсәсе
- Казан ислам университеты
- Россия ислам институты