Новости за 20.04.2024

Бүген данлыклы спортчы, дөньякүләм җиңел атлетика чемпионы Фирая Жданова-Солтанова Кубогына мәктәп укучылары арасында эстафета булды. Бу хакта «Актаныш-информ» сайтында Ләйсән Газизова яза.

Зур Кукмара мәктәбендә Россиянең атказанган төзүчесе, «Кукмара районының мактаулы гражданины» һәм башка бик күп бүләкләр иясе Мияссәр Мансуров истәлегенә шахмат турниры узды. Быел әлеге ярыш бишенче тапкыр үткәрелде. Анда үз көчләрен сынарга район мәктәпләреннән укучылар җыелды. Бу хакта «Хезмәт даны» сайтында Ризилә Корбанова яза.

«Мәйдан» журналы яңа лауреатларга үзе Язучылар берлеге белән бергә гамәлгә куйган Илдар Юзеев исемендәге әдәби-иҗтимагый премиясен тапшырды. Әлеге тантана беренче мәртәбә Казанда узды.

Язгы ташудан зыян күргән Оренбург өлкәсенә ярдәм итәр өчен республикадан 56 кеше җибәрелде. Алар арасында Балтач районы егетләре дә бар. Бу хакта «Хезмәт» сайтында Зәлия Фәйзрахманова яза.

Мәдәният тармагында эшләүче һәм элек хезмәт куйган бер төркем үзешчән артистлар Чирмешән районының өлкәннәр һәм инвалидлар йорт-интернатында яшәүчеләргә яз кәефе бүләк иттеләр. Бу хакта «Безнең Чирмешән» сайтында Кадрия Гамирова яза.

27 апрельдә Йошкар-Ола шәһәрендә «Рамазан» III Төбәкара татар иҗаты акциясе гала-концерты була. Бу хакта Бөтендөнья татар конгрессы сайтында хәбәр итәләр.

Россия Хөкүмәте медицина хезмәткәрләренең кайсыберләренә ай саен махсус социаль түләүләрне арттыру өчен чаралар күрергә тиеш. Мондый йөкләмәне Президент Владимир Путин бирде.

Түбән Камада яшәүче Рәхилә Корбангалиева һәр кичен тегүгә багышлый. Ул хәрби хезмәттәгеләр өчен мендәрләр ясый. Кечкенә эшләнмәләргә фронтта ихтыяҗ зур, чөнки мондый мендәрләр күп урын алмый, аларны күчереп йөртү уңайлы, ә окопта яки блиндажда ял итәргә кирәк булса, ярдәм итә. Бу турыда «Татар-информ» яза.

Татарстанның 28 районында мөгезле эре терлекләрнең баш саны буенча тискәре динамика күзәтелә. Бу хакта Татарстан Республикасы Хөкүмәте Йортында узган киңәшмәдә Татарстан Республикасы Авыл хуҗалыгы һәм азык-төлек министрлыгы башлыгы Марат Җәббаров сөйләде.

Татарстанның 26 районында рапс, арпа һәм бодай чәчә башладылар. Быел язгы чәчү мәйданы 1,8 миллион гектар тәшкил итә. Чәчү буенча күрсәткечләр планның 1 процентына якынлаша (14,7 мең гектар). Бу хакта РТ Хөкүмәте Йортында узган киңәшмәдә Татарстан Республикасы Авыл хуҗалыгы һәм азык-төлек министрлыгы башлыгы Марат Җәббаров белдерде.

Казанның Идел буе дәүләт физик культура, спорт һәм туризм университетында узган Татар теле һәм әдәбиятыннан XI Халыкара олимпиадасының йомгаклау тантанасында Татарстан Дәүләт Советы Рәисе урынбасары, Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе рәисе Марат Әхмәтов татар теле һәм әдәбиятыннан халыкара олимпиадада катнашучыларның телне саклауда зур роль уйнауларын билгеләде.

Казанның дипломатик берләшмәсе гомумшәһәр өмәсенә кушылды. Консуллык хезмәткәрләре һәм консуллар үзләре Лядской бакчасында 12 алмагач утыртты. Бу турыда «Татар-информ» хәбәрчесе Арсений Кәримов яза.

30 апрель көнне Бәшир Рәмиев исемендәге ИТ-паркта аудиовизуаль шоу форматындагы «Станция Мир» музыка фестивале үтәчәк. Башлана - 18.00 сәгатьтә.

21 апрельдә 10.00 сәгатьтә Самараның Җәмигъ мәчетендә «Гаилә хокукы» темасына багышланган лекция була. Бу хакта «Самара татарлары» сайтында хәбәр ителә.

Яшел Үзән районының Бело-Безводное авылында махсус операция катнашучысы Дмитрий Софронов укыган мәктәп диварына мемориаль такта урнаштыруга багышланган тантаналы митинг узды. Софронов 2022 елның 6 мартында хәрби бирем вакытында һәлак булган. Көрәштә күрсәткән батырлыгы өчен ул үлгәннән соң Батырлык орденына тәкъдим ителгән.

Россия мөселманнары Диния нәзарәте рәисе, мөфти шәеф Равил Гайнетдин боерыгы буенча, Орскидагы су басу зонасына гуманитар миссия җибәргән. Орск шәһәре Дәрбсәли Беркембаев исемендәге мәчете имам-хатыйбы Кадыйрҗан Тнаштыгулов тревога сигналының 5 апрельдә таравих-намаз вакытында яңгыравы турында сөйләгән. Бу хакта Россия Мөфтиләр шурасы сайтында хәбәр итәләр.

Быел гран-прига Рәйсә Абдуллина, Илдан Кәлимуллин һәм Зөлфия Шәрәфетдинова ия булды.

Татарстан Рәисе Рөстәм Миңнеханов Җирле үзидарә көне алдыннан районнардагы коллегаларына медальләр тапшырды һәм рәхмәт җиткерде.

Татарстан Дәүләт Советы депутатлары һәм Республика парламенты аппараты хезмәткәрләре 20 апрельдә республика башкаласының җәмәгать паркларын төзекләндерү өмәсенә килде. Парламентарийлар Казан үзәгендәге Лядской бакчасын җыештырдылар, дип хәбәр иттеләр ТР Дәүләт Советының матбугат хезмәтендә.

Чиләбе өлкәсендә «Татар гаиләсе-2024» конкурсында катнашу өчен гаризалар кабул итү башлана. Бу хакта Чиләбе өлкәсе татарлары конгрессының ВКонтакте социаль челтәрләрендәге төркемендә хәбәр итәләр.

Татарстанда 2024 елның 1 кварталы йомгаклары буенча 8 процентлы ташламалы ипотекага 12 831 гариза бирелгән. Бу 2023 елның беренче өч ае белән чагыштырганда 2,7 процентка күбрәк, дип яза РБК.

8 апрельдән 14 апрельгә кадәр бер атна эчендә Татарстанда дөге һәм бодай кыйммәтләнгән. Бу ярмаларның килограммы 104,57 һәм 42,62 сум тора башлаган. Бәяләр 1,11 һәм 1,48 процентка арткан. Бу хакта Татарстанстат статистикасы мәгълүматлары хәбәр итә.

18 апрелендә Пенза өлкәсендә берьюлы берничә татар авылында ll «Яңа йолдыз-2024» төбәк балалар иҗат һәм талант конкурсының беренче этабы узган. Бу хакта Пенза өлкәсе милли-мәдәни мохтарияте сайтында хәбәр итәләр.

8 апрельдән 14 апрельгә кадәр бер атна эчендә Татарстанда барлык маркалы бензин һәм дизель ягулыгы бераз кыйммәтләнгән. Бу Татарстанстат статистикасыннан күренә.

Чаллы шәһәренең Мәләкәс аръягы микрорайонында яңа трамвай тармагы төзү мәсьәләсе әлегә кичектерелгән. Бу хакта Татарстан Республикасы Премьер-министры Алексей Песошин ТР Дәүләт Советының 53 утырышында хәбәр итте.